Ýaradanyň ýalňyşy

Seni egýän gara güýji görýänler,
seni döwýän gara güýji görýänler,
döwýän seniň eneň bilen ataňy,
doganlaryň, dostlaryňy gaçyrýan,
çagalaryň çagalygyn ogurlan,
iliňden, ýurduňdan aýyryp urýan,
aýbygadym hany gören adamlar,
hantamalyk gapyp, belki, gözlerin,
bar barlygy şere beren adamlar,
içi gülüp, başyň ýere degende,
“Haý, boldy-da, gowy boldy” diýenler,
göýä uruş gutaran dek, howlugyp,
diri jaýlap, düşek aşyň iýenler,
aman galsaň, çydap bilmän agyra,
jabjynarlar uzak, ýakyn aradan,
ýaratmasaň bolmaýarmy adamy,
beýle kümsük, beýle ejiz, ýaradan?!.