Adam we azatlyk

O birleri halas edýär öz-özün,
urunýar, dyzaýar, boýun bolmaýar,
ýaralanýar agyr-agyr, ölmeýär,
ýarasyna sepip arassa çäge,
öz-özüni heläk edýän köplügiň.
öz-özüne köken bolýan elleri,
duzak bolýan aýagyna dilleri,
ýa çopanyň taýagyna gelmeýär,
başyn egip, öldürmeýär özünde
erkinligi bogup, duşmany ýaly,
aňryk gidýär, ýa ymtylýar çuňluga,
o birleri halas edýär öz-özün,
beýlekiler, näçe gutar, halas et,
çykar daga, azatlygyň şemaly
sypasyn ýüz-gözün onlarça ýyllap,
barar ýene dolanar-da yzyna,
eltilmese, hat ýazyşar, jaňlaşar,
yzda galan ýesir bilen, çalajan,
ýa daşarda tapar özi ýalyny,
baýragyň ýesiri, adyň ýesiri,
öz adyna ynanmaýan adamy,
nepiň guly, gepiň guly ömürlik,
o birleri gorar özün baş goýup,
beýlekisi satar her ýerde dürli.