Gidenler we galanlar

Olar üçin gorkuly däl, biz ýaly,
ýurt daşynda aglamazlar ölene,
keselläp ýa ýaş üstünden, bimahal,
galanlara yzlarynda gideniň,
uzak aralykdan, sessiz, içigip,
sebäbi ýeke däl, ýaslaryn bile,
egin-egne berip tutup bilýärler,
aglaýarlar isleseler ses edip,
ýa bolmasa agyr susup bilýärler,
tapan çöreklerin iýýärler bile,
gel diýýärler saçak ýazyp uly ile,
aç bolsalar, çaý içýärler bal edip,
ýöne käte bilmeýärler bu näme,
aýda-ýylda gürleşeňde diýýärler:
wah, gitsekdik bizem çykyp siz ýaly,
ýok, bilmeýär olar biziň halymyz,
bu, megerem, mümkin däldir ynsana,
çekmedige ozal ilinde zary,
soň ýat ilde ýaşy dammasa nana.