Biz

Niräniň niresi akylly boldy,
a biz bolduk soramaly maslahat,
nakyllary okamaly, bilmeli,
döwre görä, düzedilip düzülen,
obalydyk, kolhoz işläp ulaldyk,
eli ganly bolşewigiň döwleti
pagta gerek diýse, ýygýardyk pagta,
mal bakýardyk, gereklese et-ýagy,
düýe, sygyr, goýun-geçi köpeldip,
bäşýyllyk planyn dolduk darganyň,
duşmandan däl, çüýşesinden ýeňilip,
käbirleri doňuz bakyp ulaldy,
käbirleri towuk bakdy, gaz bakdy,
käbirleri başlyk, käsi hasapçy,
beýlekiler ak mekdepde okatdy,
bilýänlerin aýdyp bilmän aç-açan
goradylar dert-beladan lukmanlar,
ak halatly, gowy adam ählisi,
ýöne birden haldan düşseň, ýykylsaň,
kyn ýagdaýda günüň galsa, geň görme,
talap bilen talajakdy, çapjakdy,
kepen soýýan ogry kändi döwletde,
dyrjaşmaly, ýaşamaly, kim bolsaň,
arman ýene garalawçy, aklawçy,
niräniň niresi akylly boldy,
niresinde işlediň nä zawodyň,
ýa-da bolduň haýsy nurbat maşyna,
kiçi, uly, artyk dälsiň, durmak kyn,
gaýa ýaly, için üzen silleriň,
ölen öldi, galan galdy, biri biz,
kim bolsagam, otdan geçen illeriň.