Saýlamak we saýlanmak hukugy

Her kim özi, geýip görüp saýlaýar,
aýakgabyn, mümkin bolsa, elbetde,
aýagyny goýup gelmän öýünde,
täzesini geýip, könesin zyňyp,
ýyrtyk bolsa, öýe ýetmän, köçede
täze hyjuw bilen başlaýar ýola,
ýöne durmuş köwüş alan ýaly däl,
dogulmaýar adam islän ýurdunda,
milletini saýlap-seçip almaýar,
almaýar ol ene bilen atasyn,
bilimliräk diýip, ýa diýip uzyn,
ýa-da asly adam çykýan nesilden,
sen özüňi özüň etmeli durup,
aýagyň üstünde, eliň taýakly,
eger çopan bolsaň, bakyp süriňi,
aç-hor etmän, hor bolmajak bolmaly,
eger alym bolsaň, has-da kyn işiň,
çölüň möjegi däl döwjekler dişiň,
ugran ugruň göreş, boýun almaly,
diýmek, adam saýlap alýar durmuşyn,
ýa gaçmaly peýläp ýeriň pestini,
ýa-da belent daga galjak bolmaly.