Bimanynyň manysy

Hany seniň kitaplaryň,
ýa-da indi başlajakmy?
Ýa gynanýaň il halyna,
ýa-da indi daşlajakmy?

Egilýänler, aýal, erkek,
ýüze sylyp beren zadyň,
gerek dälmi saňa artyk,
alkyşlaýan işiň, adyň?

Hany seniň tigirleriň,
biri-birisinden gowy,
egin-eşik, äýnekleriň,
aýakgabyň, iň päpeje,
çaga ýaly, geýip çykan,
getirseler sowgat diýip,
özüň aşyk, özüň söýüp,
akja torbaň eliňdäki,
ýa arkaňda, gerek, belki,
hany seniň bedewleriň,
biri-birisinden gözel,
iň esasy – maşynlaryň,
eýläk süren, beýläk süren,
aýdymlaryň hany seniň,
sazy, sözi ogurlanan,
dogry, ýygnak geçirýärsiň,
ýeke özüň gürlemeli,
ýöne çäre azalýar-la,
azalýar-la gykylyklar,
gurluşyklar, açsaň baryp,
ýa bizarmyň barysyndan,
içiň, daşyň bilen aryp?