Işli adam

Her kimiň bir işi bolýar dünýede,
her kimiň bir düýşi bolýar dünýede,
özüçe çykarýar huşunda many,
o biri, gynanýan, günde-günaşa,
täze köýnek geýip, surata düşýär,
täze balak geýip, surata düşýär,
täze köwüş geýip, düşýär surata,
täze ysyrgasyn, ýene nämesin
görkezýär ol, paýlaşýar ol ýylgyryp,
eginlerin, ak ýüzüni güjeňläp,
goltuklaryn, ellerini galdyryp,
görkezýär bir kemsiz boýun-syratyn,
käbirisi ýazýar: mükemmel, pylan,
tüweleme, eçilipdir ýaradan,
her kimiň bir işi bolýar dünýede,
her kimiň bir düýşi bolýar dünýede,
birhiliräk görýär synlan gyradan.