Seniň wagtyň

Elbetde, bu seniň wagtyň,
kitap oka, okama ýa,
kinojyk gör, görme ýa-da,
ýa goşgy ýaz, ýa et bellik,
bor-bolgusyz, seniň işiň,
git ýanyna ezizleriň,
ýürek küýsän, bagyr küýsän,
ýa ýöne ýat, agyna-da,
gumajyk ýer tapan at dek,
ýa iýip-iç, gurbuň çatsa,
saýlap-seçip, ýa tapanyň,
seniň wagtyň, bu, elbetde,
alyp bilseň, gorap bilseň,
ogurlajak, aljaklardan,
sorap, haýyş edip durman,
wagtyň gitse, gelmez yza,
peýdasy ýok çekseň arman.