Milli çäk

Çilim satsaň, çigit satsaň,
hyrydaryň bolar seniň,
nas satsaň-da bolar gelen,
arak satsaň, tirýek satsaň,
ýa-da başga neşe-peşe,
ýa süýt-gatyk, çörek satsaň,
ýumurtgajyk, börek satsaň,
gök ot satsaň, bolar alan,
ýöne kitap satjak bolma,
satjak bolma goşgy ile,
alan bolmaz ony aňsat,
ýok bu ýerde uly hile,
ýaşamaz ol gazal bilen,
adam bardyr, bardyr çile,
millet bardyr, çägi bardyr,
alynmajak azal bilen.