Esasy iş

Sen özüňi paýlaýarsyň,
isleýän bar, islemeýän,
paýlaýarsyň ýüregiňi,
ýürekdeş bar, bar beýleki,
paýlaýarsyň göwnüňi sen,
bölüşýärsiň niýetiňi,
derdiň agyr ýa-da ýeňil,
käte oýun, käte çynyň,
ynanýan bar, ynanmaýan,
yhlasyňy paýlaýarsyň,
paýlaýarsyň ynanjyňy,
metjit gurman ýa gygyrman,
tapan münberiňe çykyp,
peýdalanyp pursat bolsa,
pikir etmän yzyn sözüň,
pitjiň atman beýik, pese,
garalawçy, kazy bolman,
agyr günüň, ýeňil günüň,
sen özüňi paýlaýarsyň,
bar aglaşjak, gülüşjekler,
kän bolmasyn, mesele däl,
bir seniň däl, hemmäň işi,
durmuş hemmäň döwer dişin,
hemme geçer bu ýodadan,
hemme düşer bu ýollara,
goý, çekinsin, çekinmesin,
çekilsinler senden daşa,
sen özüňi paýlaýarsyň,
pikir etmän ýeňsäň gaşap.