Uly toý

Sen adamy mör-möjekden gorarsyň,
goranar ol peşehana tikinip,
suwdan, silden, ot-yssydan, sowukdan,
ýylgyn çapyp, gamyş çatma dikinip,
gazy gazar, mal bakynar, mal ýaly,
öz-özüni werdiş edip zähmete,
gorajak bor çagasyny, özüni,
el-aýagy daňylmasa, ýesir dek,
aç galmasa gurda, guşa şam bolmaz,
maýmyn eder aldap peleňi, pili,
öz erkine oýnamaýar hiç jandar,
ýöne sen adamy gorap bilmersiň,
uly toýdan, bir-birinden, dogrusy,
o biriniň isleginden, nebsinden,
düzüwinden güýçli bolup ogrusy,
ezer olar biri-birin gaýduwsyz,
ozaly beýnisin, aňyny ýuwup,
aýagyna düşek eder başarsa,
ýorgan edip ýapynarlar adamy,
sowuk gyşda çolanan dek, hamala,
gyryp-gyrjap ýaragsyzyn, naçaryn,
gahryman bor ganojaklar, partiýa
alyp barýar diýip ýagty geljege,
diýmek, oňa garşy çykmak bolmaýar,
diýmek, ony goldamaly ikelläp,
goşgy-gazal, oda ýazyp şanyna,
ulanmaly eger bar bolsa kelläň,
bolmasa, mal bakyp, gowaça ekip,
saçyň sübse, kesewidir elleriň,
çagalaryň okuw, kitap görmezler,
a görseler, düşünmezler o kitap
kimiň gözi bilen ýazylan, çykan,
kimi kime gul etmekde niýeti,
sebäbi bu ullakan toý diýerler,
tans etmeli garyp-gasar bezenip,
o birisi çelpek ýaýsa beslenip,
beýlekisi ýagly çörek ýapmaly,
eger biri galat diýse bu oýun,
üýşüp gelip, göz agyny iýerler,
sen adamy ýel-ýagmyrdan gorarsyň,
goramarsyň partiýadan, birleşip,
adamyň kastyna çykanda adam,
olar muňa diýer uly tomaşa,
goşulmasaň borsuň keseki, ýadan.