Edenli millet

Bu mesele oýunjak däl, o millet
nijeme ýyl bir-birini horlaýar,
emel ýetse, urup ýykyp bir elde,
hassa edýär, itýär duşan çukura,
demiň alman otur ýetdiren ýerde,
garyp edýär, pakyr edýär gün-günden,
öldürýär ol biri-birin türmede,
ýa daşynda, garaw görmejek bolsa,
ýetim edýär çagalaryn adamyň,
aýalyny, ärin dul edýär gülüp,
diýseň ölüm deňdir gedaýa, hana,
hudaýhon ol, watançy ol, gürleýär,
boýun bezäp, çykarsalar ekrana,
bu mesele oýunjak däl, o millet
bile-göre elin boýady gana,
hemem özün hasaplaýar akylly,
ata-baba gelýän edenli, dana.