Abyr-zabyr

Abyr-zabyr, abyr-zabyr,
abyr-zabyr, abyr-zabyr,
o birisi etdi gowur,
bu birisi etdi gowur,
hemmesi ak, beýlekisi
bolubilse gara-goňur,
iň esasy, baş ýörelge
saga sowur, sola sowur,
samanmy, gum, alla bilsin,
hemem hudaý bersin sabyr.

Abyr-zabyr, abyr-zabyr,
o birisi atyn çapdy,
bu birisi itin çapdy,
beýlekisi halasgär täk,
eýlekisi ýoly ýapdy,
gelmersiňiz, gelmersiňiz,
hudaý maňa berdi ýurdy,
ogul-gyzym döwlet tapdy,
siz bir topar ýeňiýoluk,
abyr-zabyr, abyr-zabyr,
bu birine azgyryldy,
kemçiligi barmyş işde,
o birine duýduryldy,
soňky gezek, hemem giç däl,
ugrum tapsaň – gutularsyň,
ýok, bolmasa, tutularsyň,
o taýda-da taýýar gabyr,
bu taýda-da taýýar gabyr.

Abyr-zabyr, zabyr-abyr,
agdar-düňder boldy sabyr,
kanagaty jaýladylar,
wah, diridi, entek nebir,
iýip-içip gezjek wagty,
ýatjak wagty göçüp, guçup,
näme boldy, geçirimli,
goja dünýä kime güldi,
kime gaşyn çytdy gaty,
sylag-hormat, edep öldi,
tutulmady aýy, emma
derisin kän paýladylar,
iň öň gelen iň köp aldy,
abyr-zabyr, abyr-zabyr,
taňryň özi bersin sabyr.