Ýolda berlen maslahat

Şuňa düşün, hökümet ýa ýolbaşçy,
edenini etse, diýenin diýse,
bassa adamlary esassyz türmä,
basgylasa maşgalany, çagany,
gülki edip ak sakgally agany,
il sesini çykarmasa, ýuwutsa,
ýa aýdaly, hökümet däl, başgasy
mysal üçin, halasgärler özüçe,
agza gelen sözi diýse, eňterse,
bir gün ony, bir gün muny düňderse,
öz ýanyndan hezil edip ýeňiji,
edermen ýa batyr bolup gomparsa,
il sesini çykarmasa, ýuwutsa,
o gün biri, bolajagy, geljegi
ilik-düwme bilýän ýaly hamana,
aýdaý diýdi, şahyr bolsaň, gönüläp,
bu girdapdan çykajagy gümana.