Durmuş diwary

Şahyryň öňünde keserer diwar,
daşmy-demir, agaç-ugaç, tikenli,
ýazyjyň öňünde keserer diwar,
belent-pesli, öwrüm-öwrüm, kökenli,
žurnalistiň, hudožnigiň, sazandaň,
aýdymçyň öňünde keserer diwar,
keserer ol alym, lukman öňünde,
kim bolsaň bol, tapar hytaý diwary,
taýýarmyň ýa taýýar dälmiň, soramaz,
biri çöker baryp derrew dyzyna,
geçir meni, öňüm alma, ýalbarar,
beýlekisi gaçar görüp yzyna,
ýene biri geçjek bolar aýlanyp,
a beýleki amatyna garaşar,
biri güler, biri aglar kerpije,
ýüzün urup, gana bulap maňlaýyn,
o birisi diýer: dat-bidat, eje?