Teatr we tomaşa

Teatry ýok etdiler birleşip,
aşakdan, ýokardan köpelip artist,
okuwyny okamadyk wagtynda,
emma alan sapagyny durmuşyň,
ýalan bilen ýaşamaly ýeke-täk,
ýalan şalar düşmän ölse tagtynda,
ýene biri ylgap, gelýänçä tütäp,
millet süri, sürülmeli taýaklap,
dogry taýak TW boldy, gykylyk,
galmagala salyp adamy günde,
beýnisini çaşyrmaly, döwmeli,
arasynda beýik diýip öwmeli,
aç otursyn, türme bolsun ýaşaýyş,
Türke gidip alsyn azajyk maýyş,
garaşarlar ertir gowy bor, belki,
alla bardyr diýip, umytly ilki,
soň umytsyz, ýat illerde ölerler,
teatry ýok etdiler açgözler,
biri gitse, beýlekiler gelerler,
doýdumy ýok, doldumy ýok, ýa ýetim,
ýesirem däl hemmejesi, wah diýseň,
garny doýman ulalypdyr çörekden,
gaçdy sahnaň bar gyzygy, lezzeti,
iýip-iýip, doýduk ýalan börekden...

Teatry ýok etdiler birleşip,
teatra öwrüp bütin ülkäni,
artist boldy uly, kiçi, at we it,
bagyşlasyn, unudyldy pişikler,
ýatdan çykdy ýüke werziş eşekler,
düýeler sylandy, köşegi bilen,
düýe malym – dünýe malym diýdiler,
öwdüler çölleri gumly, sazakly,
jerenleri, owlaklary atylan,
nebit-gazy ýurt aşyryp satylan,
teatry ýok etdiler, tomaşa
awy boldy aşymyza gatylan.