Seniň wezipäň

Hiç taýagyň ýeke ujy bolmaýar,
kime degse degsin, kimiň elinde,
hiç bir tarap bolup bilmez bitarap,
goý, tans etsin aýakda däl, dilinde,
sesini çykarman, ýylgyryp, gülüp,
diri bolup oýnap, bireýýäm ölüp,
ýa gygyryp, açyp dünýäň gözüni,
bolan bolup öz ýanyndan kim, näme,
hakykat ýok bir taraply, bir günlük,
erteki bar, umyt berer, ýaşadar,
erteki bar, soňy görünmez tümlük,
seret adam näme diýýär, diýmeýär,
synla gowy, näme iýýär, iýmeýär,
a soňundan gora gözüň, gulagyň,
ýüregiňi gora, beýniňi gora,
maýyp etmän göwün atyň, ulagyň.