Tiredeşler, tiredeş däl

Biz, hemmämiz, wagty gelse,
ahyretde duşuşarys,
görüşeris, gürleşeris,
adam satan, töhmet atan
türmä iten iküç elläp,
tiredeşler, tiredeş däl,
pikirdeşler, pikirdeş däl,
pikir etmäň, görüşmeris,
ogurlanan mal-dünýe däl,
at-abraý, bilýärsiňiz,
ýöne gaýgy etmäň soňun,
gerek bolmaz artykmaç zat,
deň bolarys hemmejämiz,
sylag, hormat, dereje, at,
ýa eýerli, bezelen at,
o birine berilýän kän,
it gerek däl iň esasy,
kesip gulak-guýrugyny,
gizlin berip buýrugyny,
küşgürmäge başgalara,
maşgalasyz, maşgalaly,
başarsaňyz ýykyp öýün,
geçer dünýä näme etseň,
tutulmadyk guşy ütseň,
ýa ýolmasaň ganatyn hiç,
duşuşarys ir ýa-da giç,
menem azat, sizem azat,
sorarsyňyz, belki, adym,
tanap bilmän birden ýa-da
tanamadyk bolup, adam
müýni bolsa, emel tapar,
a men süýji ýylgyraryn,
hem diýerin galam bilen
tanka gaşy durjak bolan,
ildeşiňiz, ýurt haýyny,
diňläň indi yzdan gelýän,
boş bolsaňyz, il waýyny!