Nebis we sen

Nebis seni, walla, nämeler etmez,
nirelere itmez, çykarmaz nirden,
goly bagly, ýesir bolsaň elinde,
tapawudy näme öýlän ýa irden?

Tapawudy näme dogulsaň çyplak,
ýa-da eliň altyn, kümüş çemçeli,
ýa ýurduňy talap, giňese deriň,
altyn etseň hatda oturýan ýeriň,
allany, hudaýy diňe diliňde,
diňe ýumşak kagyz ýaly ulansaň,
baýdagyn galgadyp ölýänçäň şeriň...

Nebis seni, walla, nämeler etmez,
nirelere itmez, çykarmaz nirden,
muny senem bilýäň, bilýärin menem,
ýöne bu bir kä müritden, kä pirden,
ýatladýan özüme bolmankak ahyr,
nebis seni gülki eder äleme,
depelär öz päliň, niýetiň bilen,
diliň bilen eder göz-gülban, şahyr,
ýa ýazyjy bolsaň çaýyrçy, ogry,
düşünenler diýer diňe, wah, pahyr!