Dünýäniň göbegi

Garşymdaky gyzyl jaýyň
görünip dur ak üçegi,
işigimden ýat ülkede,
ozal çykyp aýly agşam,
ýa-da daňdan, säher çagy,
ýurdum diýip sessiz, içden
ahmyr, arman çekerdim kän,
şükür, indi düşünýärin,
dünýä öňden bozuk dükan,
gapylary döwük, ýenjik,
kim girmedi, kim çykmady,
kim dolanjak ýene, haçan,
meger, şondan dünýä ady.

Şükür, indi düşünýärin,
oýny bitmez bu dünýäniň,
her öňýeten göbegidir,
ýüzüňe syl utanýanyn,
diýip, aýdyp durmasa kän,
ýüzüňkessir urmasa kän,
çekeräk dur arlaýandan,
özün bilmän parlaýandan,
ümsüm gelip çakýanlardan,
içden, daşdan ýykýanlardan
ägä bolsaň, ýene ýagşy,
öz bilenin aýdar bagşy.