Ýurtýykanyň aladasy

Daşarky duşmanlar üýşüp, birleşip,
ýykyp bilmez ýurdy, içinde biri,
ýa birleri, ýa-da beýnisiz köplük,
içinden urmasa, ýykmasa ili,
bir ýyl däl, iki däl, on däl, ýigrimi,
ýumurmasa, çökermese dyzyna,
bu ozalam belli, häzirem belli,
nämä gerek aýtjak bolup gelniňe,
aýdan bolmak ogluňa ýa gyzyňa,
ýurt ýykylar öz içinden, satylan,
duşmana däl, gara nebsine, belki,
ýykar ony gorkusyndan, bilip däl,
ýöne tanap kimdigini özüniň,
hemem bilip ýol alanda hakykat
birden nirde açyljagyn gözüniň.