Bolmajak zat

Bir-birege diläp dünýäň gowlugyn,
iller içip, opurýarka saglygyn,
sen içmeseň, opurmasaň saglygyň,
gowy oglan dälsiň, bolmaz.

Aýdym-saza, keýpe besläp toýuny,
iller çekip, ýumurýarka öýüni,
sen çekmeseň, ýumurmasaň öýüňi,
gowy oglan dälsiň, bolmaz.

Kürsi alyp, ýaryş gurup, dalaşyp,
iller talap, ýumurýarka ýurduny,
sen çekilseň, talamasaň ýurduňy,
üstesine oturmasaň lal hem jim,
gowy oglan dälsiň, bomaz.

Ahyrynda gaçyp atyp ýat ile,
işiň etjek bolsaň başyňy egip,
tanalmasaň käte bat berip dile,
oňa iki degip, muňa üç degip,
gowy oglan dälsiň, bolmaz.