Kör we ker meselesi

Gözli körden gaty görme, görmese,
sowul ýoldan göni gelse, durmasa,
el uzatma, dil uzatma nadana,
şükür et, dur, özi gelip urmasa.

Howlugýanlar barsyn barjak ýerine,
biler herkes, belki, durjak ýerini,
sen bu dünýä gelseň, geçer gidersiň,
emma egsip, kemeltmersiň şerini.

Iň esasy özüň şer bolmajak bol,
şere daýanç bolan ýer bolmajak bol,
hemem adam sözläp, tanadýan wagty,
kör bolsaň-da, hergiz ker bolmajak bol.