Ynam meselesi

Hawa, ýaşsyň, ynanasyň geler kän,
ýogsa, ynanmaga ýokdur esasyň,
dil tansyny eder öňüňde her gün,
ertir ähli aýby açyljak asy.

Hawa, ynanarsyň, alajyň ýokdur,
ertir maňlaýyňy ýarjak diwara,
suwarsyň jaýrygyn, umydyň bardyr,
belki, öldir etmän beýle masgara.

Ýöne geçer bu döwürler, birdenkä
ynanman başlarsyň hatda özüňe,
kim men, näme ýa-da nirä barýaryn,
äýnek dakyp, bakarsyň öz ýüzüňe.

Arman tanamarsyň, başgasyň çünki,
ol ozalky oglan ýat ýa keseki,
ynanan ýurduna süýreseň gitmez,
aýagyndan ýa-da dilinden çekip.