Ýalňyş terbiýe

Meniň ejem dindar däldi üýtgeşik,
gyzydy esgeriň uruşda ýiten,
meniň kakam dindar däldi üýtgeşik,
kakasy gelse-de tötänden gaýdyp,
ikisi-de ynanýardy betiniýet
tapar diýip niýetinden, pälinden,
hemem bize, diri galan on çaga,
öwretdiler bu ýalňyşy,
sebäp olar bilmeýärdi Sokraty,
bilmeýärdi Senekanyň ykbalyn,
biz ynandyk adalata, bolmadyk,
bolmajak hiç haçan, ýogsa Pyragy,
şalar adyl bolmaz, daglar dumansyz,
diýip açyk, aýdyň aýdyp gidipdir,
kim boljagyn häkimýete geleniň,
garyp ölse, belki, aglan tapylar,
ýasy bolmaz häkimýetde öleniň.