Moda

Garaşyp ýadady millet,
o daýynyň ölerine,
başga daýyň gelerine,
ýogsa ozal öldi biri,
soň ýerine geldi biri,
ownuk bolsa, çöpläp, alyp,
özi boljak bolup iri,
wah, geçiniň jan gaýgysy,
ýag gaýgysy gassap-piriň;
garaşyp ýadady millet
bolçulygyň bolaryna,
garnyn suwa atyp ýatdy,
hepde ötdi, aý, ýyl ötdi,
ömür geçdi ýetde-gütde,
o birinde köşgi-eýwan,
o birine ýetdi hütde,
beýlekisi ýat illerde,
çörek atly, il pyýada,
garaşyp ýadady millet,
nämemiş, garaşmak moda.