Aralyk zerurlygy

Adam ilim-günüm diýsin,
eziz halkym, diýsin pylan,
baş goýjagym däldir ýalan,
garaş biraz gyssanma-da,
açar özün sözde, işde,
çykar hinden gara ýylan,
hüjümçini görýän sende,
golaýyna barmasaň-da,
ýa öňünde durmasaň-da,
malyna ýa emlägine
eliň, diliň urmasaň-da,
çakar seni, bolsa kelte
pikir-düşünjesi, adam,
ýa-da sözi, ýüzi başga,
gülüp-aglan gözi başga,
hem niýeti başga bolsa,
näçe şeker bolsun dili,
saklanjak bol biraz daşda.