Düşünmek zerurlygy
Ed Welkiň Wiskonsin parkynda tötänden düşüren suratynyň aşagyndan ýazylan goşgy
Belki, başga zady bilmän,
ýa eliňden hiç iş gelmän,
ýa düşünmän näme boldy,
ýa-da gepe, söze gidip,
sen başgany günäleme,
aýyplama özge birin,
garyplygyň üçin bu gün,
mätäçligiň üçin bu gün,
ýa galanyň üçin ýesir,
maňlaýyň urup diwara,
ýa-da diýme aýtmadylar,
goramady kimse meni
göni ýa-da gytak silden,
görme görgiň diňe ilden.
Sen başgany günäleme,
sögme birniň ejesine,
kakasyna hapa, ejiz,
pes sözleri tapyp, toplap,
günäkär bolsa-da iller,
gorap bilmän seni, özün,
öz günäňi gör gowusy,
oýjak bolman özgäň gözün.
Akmy seniň özüň beýle,
ýa-da ataň, eneň, bajyň,
ýa gördüňmi hal-ahwalyn
özüňden egsigiň, ajyň?
Sen başgany günäleme,
peýdasy az, gahar-gazap,
ýa ýigrenjiň birlerine,
hala hakly, ha bimamla,
bukulyp at, bukulman at,
degse ýa degmese okuň,
ýüp toýnukdan syrylanda,
parhy az bor ajyň, dokuň.
Sen başgany günäleme,
garyp-gatma çäç, harpygy,
bulaşdyryp bulaşygy,
çigişdirip çigişigi,
çözjek bolman düwünleri,
döwme nähak göwünleri,
saklan gara gep, töhmetden,
bilip ýa-da bilmän Alyň
aryn alma ak Ahmetden,
meger erbet bolsa erbet,
aman galmaz soýan, baýan,
hemem saňa, maňa, oňa,
ulus-ile ýeter zyýan.