Ajy hakykat
"Men çagamyň doglan ýerinde ösmegini, beýleki çagalar bilen oýnap, öz dilini öwrenmegini isleýän." Türkmen migrantynyň gürrüňinden
Ozal hakykaty aýdan-diýeni,
ýazany has beter, galamjyk alyp,
gorkuzardy KGB-çi ofiser:
çagalaryň geçýär köçeden, walla,
a maşyn kän, özi gorasyn allaň...
Sebäbi bilýär ol kanuny ýurduň
bolşewigiň türmesi hem dürresi,
öldürmek, ýok etmek adatdy, däpdi,
"ýük çekmejek eşegi hem kürresin".
Indi işsiz, ýat illerde sergezdan,
ahal-teke atyn münüp Türkiýä,
ýa-da demirgazyk Kipre gaçan
çöregi kowalap, ýetdim-ýetdimde,
hem çagasyn gaýgy edýär, ne bolar,
kim nirede galar, nirde ulalar?
Bolşewik ýaşasa, KGB bolsa,
ýurduňda ýa yzyň çalsa sürgünde,
adyny üýtgedip, tanap bilmeseň,
seniň çagaň erkin ösmez bir gün-de!