Ar

Milletimdi meniň derdim,
watanymdy, topragymdy zorlanan,
ne nebitin satdym, ne gazyn satdym,
ne pagtasyn, ne halysyn çykardym,
ne-de satdym itini ýa atyny,
ne-de arzan etdim gyzyn, gelnini,
eşek edip watany...

Il-günümdi meniň derdim,
wezipe däl, mal-dünýe däl, baýlyk däl,
ýa medal däl döşe dakylan ýalan,
öldürildim KGB-de on gezek,
on gezek dirildim, galdym ýerimden,
sebäbi bilýärdim, gorajak ýokdy,
ýokdy ýazyjysy, şahyry halkyň,
azmadyk ýa azaşmadyk ýolundan,
tersine, ýolumda durjaklar bardy,
başarsa ganatym gyrjaklar bardy,
başga işi oňarmasa gybatda
ýüzümkessir töhmet urjaklar bardy;
milletimdi meniň derdim,
watanymdy, topragymdy zorlanan,
keýpi-sapa çekmek däldi ýurt satyp,
duşmanym köp boldy tiredeş, ildeş,
ölüp begendirmek, güldürmek ardy!