Gürleýän adam

Puly gürleder adamy,
maly gürleder adamy,
pikir etme, akyly däl,
aly gürleder adamy.

Ynanar ol ýalanyna,
öz-özi gaýtalap, aýdyp,
ýalan bilen ýaşan uzak
hiç özüne gelmez gaýdyp.

Eger akly bolsa biraz,
dymar adam, gorkar gaty,
sebäbi düşüner, görer,
kim-kimleriň çykar aty.

Ýöne batyp käte suwda,
saly gürleder adamy,
güni geçmez, agyr, ýeňil
haly gürleder adamy,
agzyn dykjak kändir, dogry,
emma bir gün içindäki
däli gürleder adamy.