Jygyldaýan kürsi

O biriniň aşagynda kürsüsi,
jygyldaýar araba dek ýykyljak,
kürsi hantamalar heýjanda kileň,
mukam diňlän ýaly şirinden-şirin,
gygyrýarlar men o boldum, bu boldum,
o bolanok, bu bolanok, masgara,
diýmek, kürsi bir meniňki bolmaly,
barmaly men öz mynasyp ýerime,
il aglak bolanda çykylýan depä,
gulak asman gybat-gepe...

O biriniň aşagynda kürsüsi,
jygyldaýar, belki, çykaly bäri,
oturaly bäri ilkinji gezek,
çünki ol oturgyç çüýrük agaçdan,
posly çüý kakylyp, ýasaldy başdan,
üstesine, oturgyjy ýaglaýan,
ýa-da ýaglamaly adamlar çüýrük,
ömürlik kürsüde galjaklar bile,
hemem kürsi jygyldady, döwüldi,
eger-eger, walla, parhy ýok ile.