Sosialistik realizm

Şahyrdy diýdiler, ölüpdir pahyr,
ýatan ýeri ýagty bolsun!
Ýöne biygtyýar sorag döreýär:
nämesi şahyrdy, haýsy goşgusy
ýa setiri özünden kän ýaşajak?
Ozalky partiýa, soňky adama,
ýüzügine aşyk bolan,
halkyň ygtyýaryn alan, ogurlan,
ondan soňky taýsyz hana
hyzmat etdi ýalan sözläp, ýadaman,
keýpi-sapa çekmek üçin, elbetde,
garyp ilin ýatlamady, bilmedi,
aglamady milletiniň agysyn,
a indi ýüzi bek, yzyndan gelýän,
hemşerisi ýazýar şahyrdy, pylan,
eserleri okaljak kän bigüman.