Ýöne ýerden
Walentin Graftyň äheňinde
Ýok, sen ýöne ýerden şahyr bolmarsyň,
ýöne ýerden bolunýan zat düýpden ýok,
hatda ýöne ýerden bolmarsyň hiç kim,
goldamaýan hiç adamy,
bir özüňi goldan bolup,
aç galýançaň üçünji gün,
ýa ogurlyk edip, düşýänçäň türmä,
baş ogrynyň saýasynda,
ýa-da hakykaty öldürýän, gömýän,
ýok edişýän meýletin,
at gazanan artist, žurnalist, alym...
Ýöne ýerden ne şahyr bar, ne jellat,
kim keýpine saýlap alýar ykbalyn?