Durmuş toýy

Gulçulygyň däbin bozsaň asyrlyk,
tabynlyga tabyn bolmasaň artyk,
kaýyllyga kaýyl bolmasaň artyk,
çagyrylan ýere barman, görünmän,
çagyrylmaz ýere barsaň, görünseň,
görjek bolsaň görmesizi asyrlyk,
diýjek bolsaň diýmedigin özgeleň,
özünden düşünip, özünden bilip,
çykjak bolsaň çykylmadyk daglara,
gözüň gidip dagda biten baglara,
köküni daşlara urup,
begen bir ýa iki gezek,
sypdyrsalar diňe urup,
ölmän galmak iň esasy
ýoluň dowam etmek üçin,
menziliňe ýetmek üçin,
hiç aňsady bolmaz işiň,
gulçulykda döwüp dişiň,
ejiz, naçar galanyňdan,
ejizleriň gürrüňi bol,
gybaty bol ömrüň boýy,
şudur, meger, durmuş toýy.