Adamyň içindäki gurluşyk

Sen adamyň köşk gurma üstüne,
üçegi gümmezli altyn çaýylan,
içinde at çapyp, maşyn sürmäge,
ýa goşarna sagat dakma göwherden,
egnine geýdirip ýüpek parçany,
bezän ýaly palta salnan düýbüne,
indiki aý saman boljak arçany.

Seň adamy adam edesiň gelse,
ozaly içinde çatma gur onuň,
ýa bir kepbe, ýa bir külbe, ýel-günden
gorar ýaly, gara başyny sokup,
ýorulyp-ýadanda gyşarar ýaly,
hem düşüner ýaly öýe, tünege,
ýa-da adam nädip ýetýär jaýyna,
näme üçin argylaýar için oň,
daşyny, işigin süpürýär dynman,
ýa bejerýär üçegini her ýazda,
sen adamyň ilki içini gurman,
daşyndan köşk gurup, gynanma azsa.