Millet özün ösdürmese

Adam özün okatmasa,
adam özün ösdürmese,
çekmän öz-özüni yza,
bir-birin çökermän dyza,
çykarmasa çukuryndan,
gedemligiň, nadanlygyň,
elinden, golundan çekip,
tersine guýsa üstünden
kim-kimleriň hapasyny,
özüniňki az ýaly,
iň ýönekeý aýdylanda,
ýeňil bolmaz ahwaly.

Millet özün okatmasa,
ösdürmese ýerli-ýerden,
ýere gömse tersine,
gum sowursa öz üstüne,
bor-bolgusyz däp-dessura sygynsa,
ýa-da tapyp täze dessur,
başyn egip aşak, aşak,
agyr dymsa ýorlup, aryp,
içe salyp derdiň baryn:
iller näme diýer agzyňy açsaň,
gol gowşuryp oturmaly zyndanda,
iller näme diýer türmeden gaçsaň,
ýa-da nädip gaçjak, walla,
it daňylan bolsa türmäň agzynda...
hiç kim gelmez ony halas etmäge,
hatda özüň bolsaň türmäň daşynda,
gol uzatmakdan pikirini etmekden,
aklyň bolsa, meger, bolmaly ägä.