Ogry bolçulygy

Uly ogry kiçijik
ogrulary ýetişdirýär,
sallançaga salyp, üwräp,
arlygyny argylap,
gujagyna, dyza alyp,
emzik berip agzyna,
arasynda bökdürip,
çapak-çapak öwredip,
uly ogryň kesbi hemem käri bu,
ogrulary ýetişdirmek, ösdürmek,
öz işine höwür edip.

Emma ogry ogry bolýar her neneň
uly bolsun ýa-da görünsün goçak,
saly gowşak bolýar mydam, sebäbi
ýalan dona bürenmeýär hiç haçan,
ýa tapylýar egriň aýbyny açan.

Onsoň ogry azap edip ulaldan,
huwwalap ýatyran gijeler ýatman,
perzentlerin gurban berýär bir-birden,
ozal sypan başlaryndan daş guýup,
bu olara agyr degýär, elbetde,
ýaş ogrular sesli, sessiz aglaýar,
emma belli - Moskwa
gözýaşlara ynanmaýar,
hemem uly dursa tapylýar kiçi,
diňe tapylmak däl, içi gidende,
nobat uly bolýar örän,
ogrudan myg berýär milletiň içi.