Bir gämi

Biz, barymyz bir gämide diýýäris,
diýmek, gämi batmaly däl,
agmaly däl başga ýana,
ýa ýoluny ýalňyşyp,
çykmaly däl başga ýerden,
daga, daşa urulyp,
ýa-da düşüp girdaba,
emma muny pikir edýän hemişe
ýa az bolýar, ýa ýeterlik bolmaýar,
ýa-da hemme pikir eden
gorkusyny dile alyp bilmeýär,
çünki bilýär kimler gämä
altyn-kümüş alyp münýär,
alyp münýär tonna-tonna başga zat,
ýene biri münýär köşki-eýwanly,
gullary bar müňläp ýanda baş egýän,
kim çagasy bilen çüňkünde galsa,
aç hem suwsuz otursa-da razy,
beýlekiler meýlis gurýarka günde,
biz, barymyz bir gämide, bu dogry,
açgözlügiň derýasynda, megerem,
a kapitan, meger, iň uly ogry.