Bolşewigiň tagmasy

Erkegine "ow" diýdiler olaryň,
gyzlaryna bolsa diýdiler "owa",
erkegine "wiç", "wyç' diýdiler ýene,
aýallarna bolsa "ýewna" ýa "owna",
bu tagmady, bolşewigiň tagmasy,
hojaýynyň kimdigini görkezýän,
hem milletiň ýitip gitjegin ownap.

Olar ilki halamady bu ady,
sebäp "ogly" diýýärdiler ozallar,
sebäp "gyzy" diýýärdiler ozallar,
atasynyň adyn ýoýman, ýitirmän,
emma aga ýaraglydy, dagarman,
gylygydy gyrgynçylyk, sürgün ýa,
onsoň "owa" kaýyl boldy ulus il,
galjak bolup ýarym-ýalta gurgun ýa
tükenmejek bolup soňuna çenli,
dilini, dinini taşlan köp boldy,
ýöne bir gün hojaýynyň därisi
çyg çekdi-de, syndy şeriň şalygy,
erkinlige çykdy olar görmäge,
özbaşyna döwlet boldy, il boldy,
emma gulçulygyň tagmasy galdy,
sebäbi il erkin däldi, howatyr
ornaşypdy ýüreklerde, beýnide,
erkegine "ow" diýýärler olaryň,
gyzlaryna diýýärler "owa" hem "owna",
dowam edýär gara günler, howatyr,
umydym, ýok bolup gitmesin ownap...