Kapasa söweşi

Ol adam, guş ýaly, kapasa salnan,
ýa-da doglan kapasynyň içinde,
özi uçup, gurçuk tutup görmedik,
açylsa-da, çykyp bilmän ýa çyndan
öz gaýgysyn edip bilmän oturan,
sebäbi bar bilýän ýeri gözenek,
Güne tarap uçmak hatarly oňa,
ýa başga-da belasy kän jahanyň,
ýöne, dogry, gürrüňi kän, diňleseň,
garym-gatym, çyn-ýalanyň nirede
ýol, ýodasy aýrylyşýar, bilmeýär,
ýa bilenin saljak bolýar galyba,
boýy, ini üýtgemedik elli ýyl,
zat diýmeseň, gep gözleýär jaň edip,
osmakladyp ony-muny soraýar,
gerek dälin Staline, KGB-ä
eşitmeýär gulagyna gygyrsaň,
ýöne mydam urjak bolýar agyrdyp,
gowy bolýar diýýär öňürdip ursaň.