Şükür, asmanymyz arassa diýme,
Siriýa däl, Owganystan, Yrak däl,
ýa daş etsin, rus oky ýagmaýar,
diýme Palestina bolmasak bolýar,
dogry, eger biraz adalat bolsa,
kanunlar işlese, adamy adam...

Seniň eden işiň ondan birini,
neberesi bilen etmedik adam,
hapa gözlär gije-gündiz oturyp,
seni haýyn etmek islär iliňe,
ýa satylan pully wezipä, mala,
boýun alyp bilmez yza çekilmän...

Çukur, çukur, milli çukur,
tire-taýpa girdaby çuň,
ýykylana hezil edip,
gülüşýän kän jakyr-jukur,
bolaýdy-da, wah, boldu-la,
henizem az, hehe-hehe...

Çala tanşyň azgyrylsa birdenkä,
öz gözünden görüp, müňkür, gazaply,
ne ýaşyňy sylap, ne-de işiňi,
ýumruk salman, döwjek bolsa dişiňi,
aňsat ýaly ýigrenç bilen ýaşamak,
ýa-da köne tanyş, ýüzüňe gülüp...

Ýeri, dykdyň näme agzyny iliň,
türme bilen, töhmet bilen gorkuzyp,
ýurt içinde, daşda bükülen bili,
aýdyp dur-a manat näme bolanyn,
ýa işsizler, ýüz däl, müň däl, ýüz müňläp,
ýurtdan çykan, gürlemesin, ýaşynsyn...

Eger duşman bilseň birini çyndan,
ýa-da biri duşman edinse seni,
hiç köşeşip bilmän, aslyşyp mydam,
elinden iş gelse ýa-da gelmese,
bardygyny, niýet-pälin ýatlatsa,
amatyny peýläp, gözleme pursat...

Ýeňilende garşydaşyň,
bir adam ýa topar bolup,
döwlet bolup kagyzdaky,
iş ýüzünde ogry-jümri,
diýjek bolup mamla däl sen,
bile-göre mamladygyň...

Adam ýaly ýaşajakdyk,
ýurdumyzda, başymyz dik,
şärik bolman ogurlyga,
goşgy ýazman Lenin hakda,
jellat hakda nobatdaky,
şahyr hakda, şa hem baky.

Diletenta biri ýazypdyr, "...aga,
türkmen dilin gaty gowy bilýäňiz,
ulanýaňyz" diýip, ýüregi bilen,
başga birniň çykan zadyn ogurlan,
ak girse-de, aň girmedik diýleni,
diýmändir ýok, meniňki däl makala...

Olaryň elleri gowy ýaragly,
boýlary-da uzyn seňkiden gowy,
maşynlary gurat, döwlet adyndan,
kanunyň adyndan saklarlar seni,
ýöne senem bilýäň, olaram bilýär,
gep, mesele kanunda däl hiç haçan...