Dünýäň azaby

Diýýärler, hamala, begenýän ýaly:
"Dünýäň azabyndan dyndy pylany..."
Ýa-da şeýdip öz göwnüňi aldamak
adat bolupdyr bizde,
ýa-da durmuş gelen günüňden beýläk
azap bolmaly diňe,
aç ýatmazlyk üçin irden agşama
ýer sermenip geçmeli,
el sermejek bolup birne,
saraltmajak bolup ýüzüň,
hary-zar etmejek bolup çagaň, aýalyň,
hor bolmajak bolup, hor bolup, ylgap,
ýetip bilmän giden otlyň yzyndan,
dogrudanam, ömür diýmek azap-laý,
diýýär adam ysgyn gaçyp dyzyndan,
onsoň gijä galman gelýär ezraýyl,
diýýär: "Indi meniň bilen gitmeli!"
A yzda galanlar diýýär, hamala,
begenýän ýalaky ýa-da bialaç:
"Dünýäň azabyndan dyndy pylany..."
Sebäp ony indi goýmaz kimse aç,
ýa-da ýalaňaç.

Bölüme soňky goşulanlar


Sahypadan alnan eserler ýa-da pikirler haýsydyr bir görnüşde metbugatda ulanylanda "annagurban.coma" salgylanmak hökmanydyr.

Any views or opinions expressed on this site belong to an individual and do not necessarily coincide with those of the organization he works for.


annagurban.com copyright © 2006-2024