Magtymguly aýdan garrydar gaýgy,
gam öldürer, emma gamsyz, gaýgysyz
ýaşaýyş ýok, bolmaz, belki, hiç haçan,
bir şahyryň aýdyşy dek, ýaşajyk,
sen ony gizleme, ýaşyrjak bolma,
basma aşak depesinden, ýazgarma...
O birisi gep getirip, diri bilen duşman eder, telefon bar, gürleşersiň, juda batsa ýüregiňe, belki, aýdan puşman eder.
Bu birisi gep getirip,
öli bilen duşman eder,
telefon ýok, jaňlaşmarsyň,
näçe batsyn ýüregiňe,
tirkeşensiň, awy gatar
bile iýen böregiňe...
Hemmesine arak berip,
hemmesine tirýek berip,
azdyrmarsyň milletiň sen,
börek berip ökdeläne,
dil tansyna, el tansyna,
çapak-çapak, agyrmasyn...
Sen taryhyň çepinde däl,
sagynda gal, kynda bolsa,
aglak ili ezip, bozup,
öz ýurduny talanlaryň,
basgylanyň garyplary
gapdalynda galma, durma...
Raýdaşlyk ýok edilse milletde,
bir-birine direg bolan geçmişde,
garşylygy ýok edilse adamyň,
goranmaga gara günde şer işden,
doga berlen üşügini aldyrsa,
gowy näme, erbet näme, düşünmän...
Şem bolmagyň bar manysy,
ýagty saçmak garşy durup,
süýşüp gelýän ýa-da geljek,
dolap aljak gara tüme,
çekilmejek yza aňsat,
düşünmejek gepe, üme...
Hakykatyň ýedi tarapy bardyr,
ýedi kişi ara alyp, seretse,
bu tarap, o tarap köpeler ýene,
adam sany köpeldikçe daşynda,
nämeler diý, getir haýsy delili,
kömek etmez, her kim özünde galar...
Köp adama gerek däldir hakykat,
olar ony islemezler, görmezler,
sebäbi hakykat hemişe, hemmä
o diýen amatly, gowy duýulmaz,
üstesine oňa düşünmek, barmak,
golaýlamak aňsat bolmaz, müşgül bor...
Sahypadan alnan eserler ýa-da pikirler haýsydyr bir görnüşde metbugatda ulanylanda "annagurban.coma" salgylanmak hökmanydyr.
Any views or opinions expressed on this site belong to an individual and do not necessarily coincide with those of the organization he works for.
annagurban.com copyright © 2006-2024